Од 15 oктомври до 15 ноември, традиционално се одбележува Месецот на книгата. Во рамките на одбележување на овој настан, учениците заедно со своите наставници од ООУ „Кочо Рацин“ – Нов Дојран, ја посетија градската библиотека „Гоце Делчев“ во Валандово. Вработените во библиотеката исцрпно ги информираа учениците со дејноста на библиотеката и процесот на доаѓање на книгата во рацете на читателите, а имаа и можност да ја разгледат оваа установа.
Воедно, учениците имаа можност да го посетат и Саемот на книга со богата програма, па љубителите на пишаниот збор имаа можност да купат книга и со тоа да ја оживеат саемската магија. Целта на овие активности е поттикнување на љубовта кон книгата и читањето меѓу младите.
Во Домот на културата „25 Мај“ учениците имаа можност да го посетат и Археолошкиот музеј во кој беа изложени археолошки предмети откривани со археолошки истражувања од локалитетот Исар-Марвинци.
Во знак на одбележување на Деновите на медиумската писменост, учениците го посетија и студиото на Радио Валандово, каде што беа срдечно пречекани од радио – водителот Дени. Учениците се запознаа со начинот на кој се подготвуваат вестите, како се доаѓа до точни информации, начинот на подготовка, техничката работа, па се до финален производ. На учениците им беше нагласено да умеат да ги препознаваат точните информации, а да не веруваат во лажни дезинформации.
