Денес, положивме свежо цвеќе пред бистата на Кочо Рацин во Нов Дојран, по повод Патрониот празник на нашето основно училиште, кое го носи неговото име.
Денес, го славиме ликот и делото на нашиот патрон – Коста Солев Рацин. Личноста и делото на Кочо Рацин ја испишуваат вековитата песна на својот народ. Тие се нејзин глас и нејзина високо издигната и осознаена свест, традиција и препознавање, самобитност и непокор.
Човекот којшто пишуваше за копачите, тутуноберачите, печалбарите и аргатските маки големи на својот народ изгради мостови меѓу минатото, сегашноста и иднината. Тој е гласот на трајните и неуништливи човечки вредности, стремежи и идеали, а ние со сигурност можеме да кажеме дека Рацин претставува родоначалник на современата македонска литература.
Честит нека биде Денот на училиштето, честит и вековит да биде споменот на нашиот Коста Солев Рацин.
