Октомври е месецот на книгата, кога го поттикнуваме читањето и ги охрабруваме сите да читаат, а училишната библиотека е еден од главните извори од каде што учениците бараат знаења.
Читањето не е само здобивање со знаење, туку можност да се влезе во световите кои може никогаш нема да ги видиме. Познато е дека книгите ја имаат моќта да ви ги прошират видиците и да ве поттикнат да внесете промена во начинот на кој гледате на животот и светот околу вас. Неретко тие нудат решенија за вашите проблеми, како и бегство од реалниот во свет полн со нови идеи, фантазии и непроценливи мудрости.
Учениците од второ одделение денес ја посетија училишната библиотека заедно со нивната наставничка Николинка Ѓоргиева. Со голема радост се прошетаа низ лавиринтот од книги и се запознаа со безбројните волшебни наслови кои се сместени на библиотечните полици. Најмали и најмили наши ученици, Ви посакуваме свежи знаења и голем број прочитани книги за да го запознаете светот околу вас!
